Այն միջազգային գրանցում ունեցող առաջին հայկական երաժշտական ձեւաչափն է, որը տաղանդավոր ստեղծագործողին եւ կատարողին հանդիպելու հնարավորություն է ընձեռում:
Նշենք, որ ամիսներ առաջ նախագծի համար հայտարարվել էր մրցույթ, որին արձագանքել են հարյուրավոր ստեղծագործողներ: Մրցույթին ներկայացված ստեղծագործություններից ընտրվել են 6-ը:
«Շանթ» հեռուստաընկերության «Պրեմիերա» նախագծի ռեժիսոր եւ պրոդյուսեր Աննա Թադեւոսյանը մեզ հետ զրույցում փաստեց, որ նախագծի երրորդ եթերաշրջանը, ի տարբերություն նախորդների, մի շարք առանձնահատկություններ ունի. ««Պրեմիերա» նախագծի 3-րդ եթերաշրջանի ամենամեծ առանձնահատկությունն այն է, որ լսումների փուլ ենք ունեցել: Մարտի 6-ին՝ ժամը 21:00-ին, այն եթեր կհեռարձակվի: Այս եթերաշրջանում էստրադային, փոփ երգերից բացի՝ կներկայացվեն նաեւ ժողովրդական երգեր»:
Աննա Թադեւոսյանի տեղեկացմամբ՝ մրցույթին ներկայացված ստեղծագործություններից ընտրել են 6 երգ՝ երեք ժողովրդական եւ երեք էստրադային. «Մրցույթին շուրջ 350 հեղինակ ներկայացրել են իրենց ստեղծագործությունները, որոնցից ընտրել ենք 6-ը: Երգերի ընտրության ամենակարեւոր պայմանն այն է, որ ստեղծագործությունը պետք է լինի հետաքրքիր, գեղեցիկ եւ յուրօրինակ եւ անպայման պետք է հիթ դառնալու հավակնություն ունենա, ընդգրկի մեծ լսարան»:
Նշենք, որ երգերի ընտրությունը կատարելու է ժյուրին, որի կազմում են Գարիկ Պապոյանը, Գիսանե Պալյանը, Շուշանիկ Արեւշատյանը եւ Արսեն Սաֆարյանը: Շոուն վարելու է Գրիշա Աղախանյանը:
Այս անգամ երգերը կատարելու են «Շանթի» տարբեր նախագծերից հայտնի Հայկ Հունանյանը, Եվա Թաշչյանը, Նարե Գեւորգյանը, Ժաննա Դավթյանը, Հայկուհի Բաբախանյանը եւ Նիկ Էգիբյանը:
