Երեկ կեսօրից Բագրատաշենի մաքսային անցակետում կուտակումներ են եղել, ինչը ուղևորների դժգոհության առիթ է դարձել: Թուրքիայից վերադարձող ուղևորները բողոքել են մաքսատան աշխատանքից` համարելով որ չափազանց դանդաղ են ստուգվում իրերը և մեկ ավտոբուսի մաքսազերծումը տևում է մոտ երկու ժամ: Իսկ Պետական եկամուտների կոմիտեն հայտարարել է, որ ավտոբուսների մաքսազերծման ժամանակ զբոսաշրջիկները խոչընդոտել են մաքսային ծառայողների աշխատանքը` չենթարկվելով նրանց օրինական պահանջներին և դրսևորելով ակնհայտ ագրեսիվ պահվածք: Նշեմ նաև, որ խնդրո առարկա վերջին ավտոբուսը Բագրատաշենից շարժվել է այսօր` առավոտյան ժամը 7-ին: