Երևանի Մաշտոցի պողոտայում մոնտաժվող կրպակների շուրջ վեճը շարունակվում է։ Ոստիկանությունն այսօր հայտարարություն է տարածել, որում մասնավորապես ասվում է, որ մարտի 31-ին, ժամը 13.00-ին, Մաշտոցի պուրակում նախատեսվող ապամոնտաժման գործողությունները և մասնակիցների պահանջների հարկադրական կենսագործումը, մեջբերում եմ, չեն պաշտպանվում հավաքների ազատությամբ: Նշված ապօրինի գործողությունները կարող են որակվել որպես իրավախախտում և առաջացնել օրենքով սահմանված պատասխանատվություն: Ոստիկանությունը կրկին հիշեցնում է, որ այդ տարածքում շինարարական աշխատանքներ կատարելու վերաբերյալ կայացված վարչական ակտը կարող է վիճարկվել միայն դատական կարգով և հորդորում ու պահանջում է զերծ մնալ հակաիրավական գործողություններից։