Ֆրանսիայի, Ռուսաստանի և ԱՄՆ նախագահները հանդես են եկել Լեռնային Ղարաբաղի հիմնախնդրի վերաբերյալ համատեղ հայտարարությամբ: "Միայն խաղաղ, բանակցություններով ձեռք բերված կարգավորումը հնարավորություն կտա դուրս գալու ստեղծված իրավիճակից և կապահովի տարածաշրջանի անվտանգ և բարեկեցիկ ապագան",- ասված է հայտարարության մեջ: ԱՄՆ-ի, Ռուսաստանի և Ֆրանսիայի նախագահները կոչ են արել Հայաստանին և Ադրբեջանին բանակցություններում զերծ մնալ մաքսիմալիստական դիրքորոշումներից, պահպանել 1994 թվականին կնքված հրադադարի համաձայնագիրը և խուսափել թշնամական լարված հռետորաբանությունից: Հայաստանի արտգործնախարարն արձագանքել է հայտարարությանը նշելով, որ Հայաստանը եռանախագահ երկրների հետ միասնական և վճռական է հիմնախնդրի բացառապես խաղաղ կարգավորմանը հասնելու առումով: