Չնայած միջազգային դիտորդական առաքելության ներկայությանը, սահմանին դարձյալ կրակոցներչ են հնչել ադրբեջանական կողմից: Հակառակորդի արձակած կրակոցից ստացած վնասվածքով այսօր առավոտյան Տավուշի մարզի Բերդ քաղաքի հիվանդանոց է տեղափոխվել Ներքին Կարմիրաղբյուր գյուղի բնակիչ Վաչիկ Մելքումյանը: Տուժողը խաղողի այգում աշխատելիս է եղել, երբ ադրբեջանական հենակետից կրակ են արձակել նրա ուղղությամբ: Վաչիկ Մելքումյանն ստացել է աջ ազդրի միջանցիկ հրազենային վնասվածք: