Չիկագոյում ընթանում է ՆԱՏՕ-ի գագաթաժողովը, որին հրավիրված էր նաև Հայաստանի ղեկավարը: Սերժ Սարգսյանը սակայն որոշում է կայացրել չմասնակցել Չիկագոյի հանդիպմանը: Նախագահի այդ որոշումն այսօր մեկնաբանել է Հայաստանի արտգործնախարար Էդվարդ Նալբանդյանը, ով այժմ գտնվում է Չիկագոյում : Նա ասել է, որ համաժողովի հռչակագրի նախագծում ներառված է նաև Հարավային Կովկասում և Մոլդովայում հակամարտությունների լուծման վերաբերյալ ընդհանրական ձևակերպում, որը հակասում է Մինսկի խմբի համանախագահների մոտեցումներին:Այդ ձևակերպումը չի համապատասխանում ԵԱՀԿ շրջանակներում հիմնախնդրի կարգավորման վերաբերյալ վերջին տարիներին ընդունված հայտարարություններին և որոշումներին: Դա կարող է ոչ միայն վնաս հասցնել Լեռնային Ղարաբաղի հիմնախնդրի կարգավորման բանակցային գործընթացին, այլև վտանգել փխրուն իրավիճակը տարածաշրջանում` հատկապես Ադրբեջանի ռազմական ծախսերի աննախադեպ աճի և նրա ղեկավարության ռազմատենչ հռետորաբանության ֆոնի վրա: Այս մտահոգությունն էլ հաշվի առնելով` Հայաստանի նախագահը չի մեկնել Միացյալ Նահանգներ: