Այսօր հայտարարությամբ են հանդես եկել Հայաստանի Հանրապետական, Հայ Հեղափոխական Դաշնակցություն, Հայաստանի Դեմոկրատական, Հայաստանի Կոմունիստական, Օրինաց Երկիր կուսակցությունների ներկայացուցիչները: Հայտարարությունը հրապարակել է Հանրապետական կուսակցության անդամ Դավիթ Հարությունյանը: Ըստ հայտարարության, կուսակցություններն ուսումնասիրել են Կառավարությանն առընթեր Ազգային անվտանգության ծառայության սահմանապահ զորքերի կողմից օգտագործվող Սահմանային Էլեկտրոնային Կառավարման Տեղեկատվական համակարգի տեխնիկական հնարավորությունները: Պարզվել է, որ համակարգը պարունակում է ոչ թե անձանց Հայաստանում գտնվելու վերաբերյալ տվյալներ, այլ միայն տվյալներ սահմանային կետերը հատելու վերաբերյալ: Ընդ որում համակարգը ունի սահմանափակումներ, պայմանավորված այն հանգամանքով, որ տարբեր սահմանային կետերը միացվել են համակարգին տարբեր ժամանակահատվածներում: Վերոնշյալով պայմանավորված համակարգը չի կարող երաշխավորել անձի` Հայաստանում, կամ նրա սահմաններից դուրս գտնվելու փաստի ստույգ հաստատումը: Կուսակցությունները հանգել են նաև այն եզրակացության, որ այդ համակարգը հնարավորություն չի տալիս ավտոմատ կերպով մշակել ընտրողների ցուցակը, կատարելով նշում այս կամ այն անձի Հայաստանում գտնվելու վերաբերյալ: