Երևանի քաղաքապետարանի կրթության վարչության պետն այսօր ներկայացրել է դպրոցական ավարտական միջոցառումների ծրագիրը: Վերջին դասն այս տարի տեղի է ունենալու մայիսի 25-ին` առավոտյան ժամը 10-ին: Երեկոյան ժամը 18.00 ից մինչև 23.00-ն Ազատության հրապարակում կազմակերպվելու է տոնական համերգ, որն ավարտվելու է հրավառությամբ: Գայանե Սողոմոնյանը նաև տեղեկացրել է, որ Ազատության հրապարակում ամբողջ օրվա ընթացքում հերթափոխով աշխատելու են շտապօգնության և հրշեջ ծառայությունները: Տարածքը վերահսկելու է ոստիկանության հասարակական կարգի պահպանության ծառայությունը: Ի դեպ` Գայանե Սողոմոնյանն անդրադարձել է նաև վերջերս համացանցում հայտնված և հասարակական մեծ արձագանքի արժանացած տեսագրություններին, որոնցում պատկերված է դպրոցահասակ աղջիկների հայհոյախառն ծեծկռտուքը: Նա ասել է, որ Քաղաքապետարանի ու կրթության և գիտության նախարարության համապատասխան վարչությունները խիստ հանձնարարականներ ունեն հետևողականորեն զբաղվել այս տեսանյութով և բացահայտել դեպքի մանրամասները: